திருச்சி. காவலாளிக்கு தவறான அறுவை சிகிச்சை செய்த புத்தூர் ஏஜி கண் மருத்துவமனைக்கு ரூ.12 லட்சம் நஷ்டஈடு வழங்க கோர்ட் உத்தரவு .

'- Advertisement -

திருச்சியில் உள்ள ஏ.ஜி. கண் மருத்துவமனையின் கவனக் குறைவான சிகிச்சையால் காவலாளிக்கு கண் பாா்வை பறிபோன வழக்கில் ரூ.12 லட்சம் நஷ்ட ஈடு வழங்க திருச்சி மாவட்ட நுகா்வோா் நீதிமன்றம் நேற்று முன்தினம்  வெள்ளிக்கிழமை உத்தரவிட்டது.

திருச்சி தில்லை நகா் ரகுமானியபுரத்தைச் சோ்ந்தவா் க. ராமராஜ் (வயது 65). இரவு நேரக் காவலாளியான இவா் தனது வலது கண்ணில் ஏற்பட்ட உறுத்தல், வலி காரணமாக கடந்த 2016 மே மாதம் திருச்சி அரசு பொது மருத்துவமனை எதிரே ஆபிசா்ஸ் காலனியில் உள்ள ஏ.ஜி கண் மருத்துவமனையை அணுகினாா்.

அங்கு அவரைப் பரிசோதித்த மருத்துவா்கள், கண்களில் புரை ஏற்பட்டுள்ளதால் இரு கண்களிலும் அறுவைச் சிகிச்சை செய்து, லென்ஸ் பொருத்த வேண்டும். அப்படி செய்தால் நன்கு பாா்வை தெரியும் எனக் கூறியுள்ளனா். இதைத் தொடா்ந்து கடந்த 22-06-2016 இல் இடக் கண்ணிலும், 26-8-20216 இல் வலக் கண்ணிலும் அறுவைச் சிகிச்சை செய்தனா்.

இருப்பினும் 6 ஆண்டுகளாக கண்களில் ஏற்பட்ட பிரச்னைகள் தீரவில்லை. இதனால் கடந்த 2022 மே மாதம் மீண்டும் ஏ.ஜி.கண் மருத்துவமனையை ராஜராஜ் அணுகியபோது, மீண்டும் வலக் கண்ணில் இரண்டாவது முறையாக அறுவைச் சிகிச்சை செய்தனா். இதையடுத்து ராமராஜுக்கு இரு கண்களும் பாதிக்கப்பட்டு, முழுமையாகப் பாா்வை தெரியவில்லை.

இதனால் பாதிக்கப்பட்ட ராமராஜ் திருச்சி மாவட்ட நுகா்வோா் குறைதீா் ஆணையத்தில் கடந்த 2023 பிப்ரவரி 23 இல் மனு தாக்கல் செய்தாா். மனுதாரா் தரப்பில் வழக்குரைஞா் சு. சதீஷ்குமாா் ஆஜராகி வாதிட்டாா்.

இந்த மனுவை திருச்சி மாவட்ட நுகா்வோா் குறைதீா் ஆணையத் தலைவா் டி. சேகா், உறுப்பினா்கள் ஜே.எஸ். செந்தில்குமாா், ஆா். சாயீஸ்வரி ஆகியோா் அடங்கிய அமா்வு நேற்று முன்தினம்  வெள்ளிக்கிழமை விசாரித்தது. விசாரணைக்குப் பிறகு ராமராஜின் கண் பாா்வை இழப்புக்கு தனியாா் மருத்துவமனை மருத்துவா்களின் கவனக்குறைவே காரணம். எனவே மனுதாரருக்கு கண் அறுவைச் சிகிச்சைக்கான நஷ்டஈடாக 12 சதவீத வட்டியுடன் ரூ. 10 லட்சமும், மன உளைச்சலுக்காக ரூ. 2 லட்சமும், வழக்கு செலவுத் தொகையாக ரூ. 10 ஆயிரத்தையும் 45 நாள்களுக்குள் 9 சதவீத வட்டியுடன் சோ்த்து வழங்கவும் உத்தரவு பிறப்பித்தனா்.