திருச்சி தனலட்சுமி சீனிவாசன் பிரீமியர் லீக் 2026” வெகு விமரிசையாகத் தொடங்கியது. 13 மாவட்ட பள்ளி மாணவ மாணவிகள் கலந்துக்கொள்ளும் இந்த போட்டியில் பரிசுத்தொகை ரூ. 50 லட்சம்

'- Advertisement -

​திருச்சி தனலட்சுமி சீனிவாசன் பல்கலைக்கழகத்தில் 13 மாவட்ட பள்ளி மாணவர்களுக்கான மாபெரும் விளையாட்டுப் போட்டி: ரூ.50 லட்சம் மதிப்பிலான பரிசுகள் அறிவிப்பு!

திருச்சி தனலட்சுமி சீனிவாசன் பல்கலைக்கழகத்தில் பல்வேறு மாவட்டங்களை சேர்ந்த 11 மற்றும் 12-ஆம் வகுப்பு பயிலும் பள்ளி மாணவ, மாணவிகளுக்கான மாவட்ட அளவிலான பிரம்மாண்ட விளையாட்டு விழா “தனலட்சுமி சீனிவாசன் பிரீமியர் லீக் 2026” வெகு விமரிசையாகத் தொடங்கியது.

​தனலட்சுமி சீனிவாசன் பல்கலைக்கழக வேந்தர் சீனிவாசன் அவர்களின் வழிகாட்டுதலின் படி பல்கலைக்கழகத்தின் விளையாட்டுத் துறை இயக்குநரகம் சார்பில் பல்கலைக்கழக மைதானத்தில் நடைபெறும் இப்போட்டிகளில் வெற்றி பெறுவோருக்கு ஒட்டுமொத்தமாக ரூ.50 லட்சம் மதிப்பிலான பரிசுத்தொகைகள் வழங்கப்பட உள்ளது.

​முன்னதாக, இப்போட்டிகளுக்கான மாணவர் பதிவு செப்டம்பர் 30-ஆம் தேதி தொடங்கி அக்டோபர் 13-ஆம் தேதி வரை நடைபெற்றது. இதனைத் தொடர்ந்து இன்று நடைபெற்ற தொடக்க விழாவில், பல்கலைக்கழக துணை வேந்தர் டாக்டர் ரஞ்சன், பதிவாளர் டாக்டர் செல்வகுமார் ஆகியோர் கலந்துகொண்டு விளையாட்டுப் போட்டிகளை துவக்கி வைத்தனர்.

​இப்போட்டிகளில் திருச்சி, புதுக்கோட்டை, தஞ்சாவூர், திருவாரூர், மதுரை, கரூர், சிவகங்கை, மயிலாடுதுறை, கடலூர், பெரம்பலூர், திண்டுக்கல், நாகப்பட்டினம் மற்றும் அரியலூர் ஆகிய 13 மாவட்டங்களைச் சேர்ந்த பள்ளி அணிகள் பெருமளவில் பங்கேற்க உள்ளனர். 

​முன்னதாக மாணவர்களிடையே பேசிய துணை வேந்தர் டாக்டர் ரஞ்சன் அவர்கள் விளையாட்டு போட்டியின் முக்கியத்துவத்தை மாணவர்களுக்கு எடுத்து கூறினார். பதிவாளர் டாக்டர் செல்வகுமார் அவர்கள் போட்டியில் பங்கேற்கும் மாணவர்களுக்கு தனது வாழ்த்துக்களை தெரிவித்தார்.

​இந்த மாபெரும் விளையாட்டு விழாவில் கபடி, கைப்பந்து போட்டி, கோ-கோ, பூப்பந்தாட்டம் உள்ளிட்ட குழு விளையாட்டுப் போட்டிகளும்; 100 மீட்டர், 200 மீட்டர், 400 மீட்டர் ஓட்டம், தொடர் ஓட்டம், நீளம் தாண்டுதல், உயரம் தாண்டுதல், குண்டு எறிதல், வட்டு எறிதல் மற்றும் ஈட்டி எறிதல் போன்ற தடகளப் போட்டிகள் உள்பட பல்வேறு போட்டிகள் நடைபெற உள்ளது.

​முதல் நாளான இன்று குழு போட்டியான கபடி போட்டி சிறப்பாக நடைபெற்றது மாணவர்கள் மிகுந்த ஆர்வத்துடன் இப்போட்டியில் கலந்து கொண்டனர் தொடர்ந்து இரண்டு நாட்கள் கபடி போட்டி நடைபெறவுள்ளது குறிப்பிடத்தக்கது.

​மாணவர்களின் விளையாட்டுத் திறனை ஊக்குவிக்கும் வகையில் மாபெரும் பரிசுத் தொகைகள் அறிவிக்கப்பட்டுள்ளன. ஒட்டுமொத்த சாம்பியன்ஷிப் பட்டத்தை வெல்லும் பள்ளிக்குச் சிறப்புப் பரிசுகள் வழங்கப்பட உள்ளன.

​குழு விளையாட்டுகள்: முதலிடம் பெறும் அணிக்கு ரூ. 1 லட்சம், இரண்டாமிடம் பெறும் அணிக்கு ரூ. 75 ஆயிரம், மூன்றாம் மற்றும் நான்காம் இடங்களைப் பெறும் அணிகளுக்குத் தலா ரூ. 25 ஆயிரம் ரொக்கப் பரிசு வழங்கப்படும்.

​தடகளப் போட்டிகள்: முதலிடம் பெறுபவருக்கு ரூ. 50 ஆயிரம், இரண்டாமிடம் பெறுபவருக்கு ரூ. 30 ஆயிரம், மூன்றாமிடம் பெறுபவருக்கு ரூ. 15 ஆயிரம் ரொக்கப் பரிசாக வழங்கப்படும்.

​மேலும், மாணவர்களின் பயண வசதியை ஊக்குவிக்கும் விதமாக, போட்டிகளில் பங்கேற்கும் அனைத்து அணிகளுக்கும் பேருந்துக் கட்டணமாகத் தலா ரூ. 2,000 வழங்கப்பட உள்ளது குறிப்பிடத்தக்கது.

​மேலும் குழு போட்டியான கைப்பந்தாட்டம் அக்டோபர் 22, 23 & 24 ஆகிய தேதிகளிலும், கோ கோ போட்டி மற்றும் பூப்பந்தாட்டம் அக்டோபர் 26, 27 & 28 ஆகிய தேதிகளிலும் நடைபெறவுள்ளது. இறுதியாக தடகள போட்டிகள் நவம்பர் மாதம் 13, 14 & 15 ஆகிய தேதிகளில் நடைபெறவுள்ளது. அனைத்து போட்டிகளிலும் 11 மற்றும் 12-ஆம் வகுப்பு பயிலும் பள்ளி மாணவ, மாணவிகள் கலந்து கொள்ளலாம் என தெரிவிக்கப்பட்டுள்ளது.