திருச்சியில் கடந்த சில நாட்களுக்கு முன்பு சந்து கடை அருகே உள்ள சௌந்தரபாண்டியன் பிள்ளை தெருவில் ஜோசப் என்பவரின் நகை பட்டறையின் பூட்டை உடைத்து கொள்ளை கும்பல் ஒரு கிலோ தங்கம், கால் கிலோ வெள்ளி, ரூபாய் ஒரு லட்சத்து 50 ஆயிரம் பணத்தை திருடிக்கொண்டு தப்பி ஓடினர். இந்த சம்பவம் தொடர்பாக கோட்டை போலீசார் வழக்கு பதிவு செய்து திருட்டு நடந்த நான்கு மணி நேரத்தில் கொள்ளை கும்பலை சேர்ந்த 4 பேரை கைது செய்தனர்.இந்த பரபரப்பு சம்பவம் நடந்த சில நாட்களில் மீண்டும் அதே பகுதியில் மற்றொரு நகை பட்டறையில் திருட்டு சம்பவம் நடந்து இருப்பது பெரும் அதிர்ச்சியை ஏற்படுத்தி உள்ளது.
திருச்சி பெரிய கடைவீதி சந்து கடை பகுதி சௌந்தரபாண்டியன் பிள்ளை தெருவை சேர்ந்தவர் பிரபு இவர் சுண்ணாம்பு கார தெருவில் நகை பட்டறை வைத்து நடத்தி வருகிறார்.
நேற்று இரவு நகை பட்டறையை பூட்டிவிட்டு வீட்டுக்கு சென்று விட்டார். இந்த நிலையில் இன்று காலை அந்த கடையில் அருகில் உள்ள நபர்கள் கடையின் பூட்டு உடைக்கப்பட்டு இருப்பதை கண்டு அதிர்ச்சடைந்து உடனடியாக செல்போன் மூலம் பிரபுவிற்கு தகவல் தெரிவித்தனர். இதை யடுத்து பிரபு உடனடியாக கோட்டை போலீசாருக்கு தகவல் தெரிவித்தார். தகவல் அறிந்து கோட்டை போலீசார் சம்பவ இடத்திற்கு விரைந்து சென்று பார்வையிட்டனர். அப்பொழுது நகை பட்டறையின் கதவு உடைக்கப்பட்டு இருந்தது தெரிய வந்தது.
மேலும் உள்ளே சென்று பார்த்தபோது பணப்பெட்டியில் இருந்த ரூபாய் 50 ஆயிரம் பணம் மற்றும் 10 கிராம் தங்க நகை திருடப்பட்டு இருப்பது தெரியவந்தது. இதை தொடர்ந்து கோட்டை போலீசார் வழக்கு பதிவு செய்து நகை மற்றும் பணத்தை திருடிய மர்மஆசாமிகள் யார? என்று தீவிர விசாரணை நடத்தி வருகின்றனர். இதற்கிடையில் திருட்டு நடந்த நகை பட்டறைக்கு மோப்ப நாய் மற்றும் கைரேகை நிபுணர்கள் விரைந்து சென்று சோதனையில் ஈடுபட்டனர்.கடந்த சில நாட்களுக்கு முன்பு அதே பகுதியில் இது போன்று நகை பட்டறையில் திருட்டு சம்பவம் நடந்திருக்கும் நிலையில் மீண்டும் மற்றொரு நகை பட்டறையில் திருட்டு சம்பவம் நடந்திருப்பது நகை பட்டறை உரிமையாளர்களிடையே பெரும் அதிர்ச்சியை ஏற்படுத்தி உள்ளது.
