துணை சபாநாயகர் தாக்கிய வீடியோ எதிரொலி, பதவி நீக்கம் செய்தால் தவெக அரசுக்கே ஆபத்தா? முழு விபரம்

தமிழக அரசியலில் தவெக ஆட்சி அமைந்து 6 மாதங்கள் நிறைவடைந்துள்ள சூழலில், இப்போது ஒரு புதிய புயல் கிளம்பியுள்ளது.

தமிழக சட்டமன்றத் துணை சபாநாயகரும், தவெக எம்.எல்.ஏ-வுமான எம். ரவிசங்கர் உதவி கேட்டு வந்த நபர் ஒருவரை தாக்கியதாக வெளியான வீடியோ இணையத்தில் வைரலாகி பெரும் சர்ச்சையை ஏற்படுத்தியுள்ளது.

குடிநீர் தட்டுப்பாடு, குப்பை பிரச்சனை போன்ற அடிப்படை தேவைகளைக் கேட்கச் சென்ற கார்த்திக் குமார் என்ற நபரை துணை சபாநாயகர் அடித்ததாகக் குற்றம் சாட்டப்பட்டுள்ளது. அந்த நபர் அரசு மருத்துவமனையில் அனுமதிக்கப்பட்டதும், பின்னர் இருவரும் சமாதானமாகிவிட்டதாக மற்றொரு வீடியோ வெளியானதும், அதன்பின் தன்னை மிரட்டிதான் அந்த வீடியோவை எடுக்க வைத்ததாக பாதிக்கப்பட்டவர் கூறியதும் அரசியல் களத்தில் கடும் விவாதங்களை எழுப்பியுள்ளது.

இதன் காரணமாக, கட்சியின் பெயரைக் காக்க துணை சபாநாயகர் பதவியிலிருந்து ரவி சங்கரை முதலமைச்சர் விஜய் நீக்கக் கூடும் என்று தகவல்கள் வெளியாகி வருகின்றன. நாளை நடக்கும் தவெக எம்எல்ஏக்கள் கூட்டத்தில் இதற்கான முடிவு எடுக்கப்படலாம்.

ஆனால், அவரை நீக்கினால் அதுவே தவெக அரசுக்கு சட்டமன்றத்தில் மிகப்பெரிய சிக்கலாக மாறுமா? சட்டமன்ற கணக்கு என்ன சொல்கிறது? என்பதை மிக எளிமையாகப் பார்ப்போம்.

தமிழக சட்டமன்றத்தில் மொத்த இடங்கள் 234. இதில் தற்போது 5 இடங்கள் காலியாக உள்ளன. எனவே, தற்போது சட்டமன்றத்தில் உள்ள மொத்த உறுப்பினர்களின் எண்ணிக்கை 229 ஆகும்.

ஒரு தீர்மானத்தையோ அல்லது புதிய துணை சபாநாயகரையோ தேர்ந்தெடுக்க, அவையில் இருக்கும் பெரும்பான்மை எம்எல்ஏக்களின் ஆதரவு (115 வாக்குகள்) தேவை.

தவெக கூட்டணி –

தவெக – 109

காங்கிரஸ் – 5

விடுதலைச் சிறுத்தைகள் – 2

இந்திய யூனியன் முஸ்லிம் லீக் – 2

வெளியில் இருந்து ஆதரவு ( 5 இடங்கள்)

மார்க்சிஸ்ட் கம்யூனிஸ்ட் – 2

இந்திய கம்யூனிஸ்ட் – 2

அமமுக – 1

அரசுக்கு ஆதரவான மொத்த பலம்: 123

எதிர்க்கட்சிகள் (106 இடங்கள்):

திமுக கூட்டணி: 60 (திமுக 59, தேமுதிக 1)

அதிமுக கூட்டணி: 46 (அதிமுக 41, பாமக 4, பாஜக 1)

ஒரு துணை சபாநாயகர் தனது பதவியை ராஜினாமா செய்தாலோ அல்லது நீக்கப்பட்டாலோ, அந்தப் பதவிக்கு சட்டமன்ற விதிகளின்படி புதிய தேர்தல் நடத்தப்பட வேண்டும். அப்போது சட்டமன்றத்தில் ரகசிய வாக்கெடுப்போ அல்லது குரல் வாக்கெடுப்போ நடைபெறும்.

இங்குதான் தவெக அரசுக்கான சிக்கல் தொடங்குகிறது.தவெகவுக்கு தற்போது 109 எம்.எல்.ஏ-க்கள் மட்டுமே உள்ளனர். பெரும்பான்மைக்குத் தேவையான 115 வாக்குகளைப் பெற, தவெக தனது கூட்டணிக் கட்சிகளை முழுமையாக நம்பியே இருக்க வேண்டும்.

ஏற்கனவே சிபிஐ மற்றும் சிபிஎம் கட்சிகள் தவெக அரசின் சில நிர்வாக நடவடிக்கைகளுக்கு அதிருப்தி தெரிவித்து வருவதாகவும், அவர்கள் அரசுக்கு அளித்து வரும் வெளியில் இருந்து வழங்கும் ஆதரவை தொடர்வதில் தயக்கம் காட்டுவதாகவும் அரசியல் வட்டாரங்கள் தெரிவிக்கின்றன. அவர்கள் (4 எம்.எல்.ஏ-க்கள்) வாக்கெடுப்பில் எதிராக வாக்களித்தால் அரசின் பலம் 123-ல் இருந்து 119 ஆகக் குறையும்.

 

கூட்டணியில் உள்ள காங்கிரசுக்கு 5 எம்.எல்.ஏ-க்கள் உள்ளனர். ஒருவேளை காங்கிரஸ் கட்சியில் உள்ள 2 அல்லது 3 எம்.எல்.ஏ-க்கள் கட்சித் தலைமையை மீறி வாக்கெடுப்பில் எதிராக வாக்களித்தாலோ அல்லது அவைக்கு வராமல் தவிர்த்தாலோ, தவெக அரசு பெறும் வாக்குகள் 114 அல்லது அதற்கும் கீழே சரியக்கூடும். 3 பேர் எதிராக வாக்களித்தால்.. கட்சி தாவல் தடை சட்டமும் செல்லாமல் போகும்.. அவர்கள் தனி அணியாக கருதப்படுவார்கள்.

அதே நேரத்தில், எதிர்க்கட்சிகளான திமுக (60) மற்றும் அதிமுக கூட்டணிகள் (46) இணைந்து 106 வாக்குகளை வைத்துள்ளன. அதிருப்தி உறுப்பினர்களின் வாக்குகள் இவர்களுடன் சேர்ந்தால், ஆளும் கட்சி நிறுத்தும் புதிய துணை சபாநாயகர் வேட்பாளர் தோல்வியடையும் அபாயம் உருவாகும்.

சட்டமன்றத்தில் ஆளும் கட்சி கொண்டுவரும் ஒரு சாதாரண மசோதாவோ அல்லது சபாநாயகர்/துணை சபாநாயகர் தேர்தலோ தோல்வியடைந்தால், அரசு உடனடியாகக் கவிழ்ந்துவிடாது. ஆனால், ஆளும் கட்சிக்கு அவையில் பெரும்பான்மை இல்லை என்பது வெளிப்படையாகத் தெரிந்துவிடும்.

தவெக ஆட்சிப் பொறுப்பேற்று 6 மாதங்கள் முடிந்துவிட்ட நிலையில், எதிர்க்கட்சிகள் உடனடியாக நம்பிக்கையில்லாத் தீர்மானம் கொண்டுவர இந்த வாய்ப்பைப் பயன்படுத்திக் கொள்ளும்.

தவெக அரசு தனது 115-க்கும் மேற்பட்ட ஆதரவை நிரூபித்தே ஆக வேண்டும்.

காங்கிரஸ், விசிக, முஸ்லிம் லீக் மற்றும் இடதுசாரிகள் என அனைத்து தோழமைக் கட்சிகளும் ஒருமித்த குரலில் ஆதரவளித்தால் மட்டுமே தவெக அரசு தப்பும். இதில் ஏதேனும் ஒரு கட்சி விலகினாலும் அல்லது காங்கிரசில் சில எம்.எல்.ஏ-க்கள் மாற்றி வாக்களித்தாலும் அரசு பெரும்பான்மையை இழந்து ஆட்சிக்கு ஆபத்து ஏற்படும் சூழல் உருவாகும்.

மக்கள் மத்தியில் உருவான கெட்ட பெயரைத் துடைக்க இது உதவும். ஆனால், புதிய தேர்தல் நடக்கும்போது கூட்டணிக் கட்சிகள் வைக்கும் நிபந்தனைகளுக்கு அடிபணிய வேண்டியிருக்கும் அல்லது வாக்கெடுப்பில் சிக்கலைச் சந்திக்க நேரிடும்.சட்டமன்றப் பதவியைத் தொடரவிட்டு, கட்சிப் பொறுப்பில் இருந்து மட்டும் அவரைத் தற்காலிகமாக நீக்குவது. இதன் மூலம் சட்டமன்ற வாக்கெடுப்பு என்ற ஆபத்தான சூழலை தவெக தற்காலிகமாகத் தவிர்க்க முடியும்.

ஒரு வீடியோ சர்ச்சையால் தொடங்கிய இந்த விவகாரம், சட்டமன்ற பழத்தின் காரணமாக தவெக அரசின் ஆட்சியையே சோதிக்கும் அளவுக்கு அரசியல் முக்கியத்துவம் பெற்றுள்ளது. கூட்டணிக் கட்சிகளை விஜய் எவ்வாறு அரவணைத்துச் செல்லப் போகிறார் என்பதில்தான் இந்தச் சிக்கலுக்கான விடை அடங்கியுள்ளது.