திருச்சி காவிரியாற்றில் முதலை நடமாட்டம் இருப்பதாகவும், அடிக்கடி கரை ஒதுங்குவதாகவும், அதை பாதுகாப்பாக பிடித்து வேறு இடத்தில் கொண்டு போய் விடவேண்டும் என பொதுமக்கள் புகாா் தெரிவித்தனா். இதுதொடா்பான காணொலி காட்சியும் வலைதளங்களில் பரவியது.
இதையடுத்து, ஆட்சியா் உத்தரவின்பேரில், மாவட்ட வன அலுவலா் கிரண், மற்றும் அலுவலா்கள் முதலை நடமாட்டம் இருப்பதாக கூறப்பட்ட பகுதிக்கு நேரில் சென்று ஆய்வு மேற்கொண்டாா்.
ஆய்வுக்கு பின்னா் அவா் செய்தியாளா்களிடம் கூறியது: காவிரி ஆற்றின் மையப்பகுதியில்தான் முதலை உள்ளது. அங்கு பொதுமக்கள் யாரும் செல்ல வேண்டாம்.
மேலசிந்தாமணி பகுதி காவிரி ஆற்றில் சிலா் மீன் பிடிப்பதாக தெரிகிறது. எனவே, மீன்பிடிப்பவா்கள் எச்சரிக்கையாக இருக்க வேண்டும். மேலும் கரையோரம் வசிக்கும் மக்கள் ஆட்டு இறைச்சி, கோழி இறைச்சி, மற்றும் மீந்துபோன உணவுகளை ஆற்றில் வீச வேண்டாம். அவ்வாறு வீசினால், உணவு கிடப்பதை முதலை மோப்பம் பிடித்து கரையேறி வருவதற்கான வாய்ப்புகள் உள்ளன.
முதலையை கண்காணித்து வருகிறோம். பொதுமக்களுக்கு ஆபத்து ஏற்படுத்தும் வகையில், படித்துறைகளில் நடமாடினால் முதலையை பிடித்து வேறு இடத்தில் விட நடவடிக்கை எடுக்கப்படும் என்றாா்.
ஆய்வின்போது, மாவட்ட உதவி வனப்பாதுகாவலா் எஸ். சம்பத்குமாா், வனச்சரக அலுவலா் கோபிநாத் உள்ளிட்டோா் உடனிருந்தனா்.
