'- Advertisement -
கன்னியாகுமரி மாவட்டம் சுசீந்திரம் பகுதியில் சாதாரண உடையில் நின்ற காவல் உதவி ஆய்வாளரை விபசாரத்திற்கு அழைத்துத் தொல்லை கொடுத்த நர்ஸ் மற்றும் புரோக்கர்கள் உள்பட 3 பேர் அதிரடியாகக் கைது செய்யப்பட்டுள்ளனர்.மேலும், அங்கு மீட்கப்பட்ட 3 இளம்பெண்கள் காப்பகத்தில் அடைக்கப்பட்டுள்ளனர்.
சுசீந்திரம் காவல் நிலைய உதவி ஆய்வாளர் (SSI) தனியோஷ் லியோன் தலைமையிலான காவலர்கள் மப்டி உடையில் சொத்த விளை பகுதியில் ரோந்துப் பணியில் ஈடுபட்டிருந்தனர். அப்போது அங்கு வந்த ஒரு இளம்பெண், ரூ. 2,000 கொடுத்தால் உல்லாசமாக இருக்கலாம் எனக்கூறி எஸ்.ஐ.யை விபசாரத்திற்கு அழைத்துள்ளார்.
இதைக் கவனித்த உதவி ஆய்வாளர், அப்பகுதியில் விபசாரம் நடைபெறுவதைத் தெரிந்து கொண்டு உடனடியாகச் சுசீந்திரம் காவல் நிலையத்திற்குத் தகவல் அளித்துள்ளார். மேலும், அந்தப் பெண்ணைப் பின்தொடர்ந்து அவர் குறிப்பிட்ட வீட்டிற்குள் சென்றுள்ளார்.
உதவி ஆய்வாளரின் தகவலை அடுத்து, சுசீந்திரம் காவல் நிலையக் காவலர்களும் உடனடியாக அவ்வீட்டிற்கு விரைந்து சென்று வீட்டைச் சுற்றி வளைத்து அதிரடி சோதனையில் ஈடுபட்டனர்.
அப்போது அந்த வீட்டில் அரைகுறை ஆடைகளுடன் 3 இளம்பெண்களும், 3 ஆண்களும் இருப்பது தெரியவந்தது. அவர்களிடம் நடத்தப்பட்ட விசாரணையில் திடுக்கிடும் தகவல்கள் வெளியாயின:
எஸ்.ஐ.யை உல்லாசத்திற்கு அழைத்த அந்தப் பெண், நாகர்கோவில் ஒழுகினசேரி பகுதியைச் சேர்ந்த ஒரு தனியார் மருத்துவமனையில் நர்சாகப் பணியாற்றும் 26 வயது இளம்பெண் என்பது தெரியவந்துள்ளது. இவர்தான் வெளியூர்களில் இருந்து பெண்களை அழைத்து வந்து நாகர்கோவிலில் விபசாரத்தில் ஈடுபடுத்தி வந்துள்ளார்.
விபசாரம் நடத்த வீட்டை வாடகைக்கு விட்ட உசரவிளையைச் சேர்ந்த மகேஷ், புரோக்கர்களாகச் செயல்பட்ட மணவாளக்குறிச்சி தருவையைச் சேர்ந்த ஹரிஹரன் (வயது 40 ) பூக்கடைத் தொழிலாளி), மற்றும் கடியப்பட்டணத்தைச் சேர்ந்த மீனவர் அலெக்சாண்டர் (வயது 60) ஆகியோரும் பிடிபட்டனர்.
விபசாரத்தில் ஈடுபடுத்தப்பட்ட மற்ற 3 பெண்களும் குளச்சல் அருகே அம்மாண்டிவிளை மற்றும் தூத்துக்குடி தாளமுத்து நகரைச் சேர்ந்தவர்கள் என்பது தெரியவந்தது.
இதையடுத்து, விபசாரக் கும்பலுக்கு உடந்தையாக இருந்த நர்ஸ், புரோக்கர்கள் ஹரிஹரன், அலெக்சாண்டர் ஆகிய 3 பேரையும் போலீசார் கைது செய்தனர். மேலும், மீட்கப்பட்ட 3 இளம்பெண்களைப் பாதுகாப்பாக நாகர்கோவிலில் உள்ள காப்பகத்திற்கு அனுப்பி வைத்தனர்.
கைது செய்யப்பட்ட நர்ஸ் மகளிர் சிறையிலும், மற்ற இருவர் நாகர்கோவில் மாவட்டச் சிறையிலும் அடைக்கப்பட்டனர். மப்டி உடையில் இருந்த காவல்துறை அதிகாரியையே விபசாரத்திற்கு அழைத்த பெண் சிக்கிய சம்பவம் அப்பகுதியில் பரபரப்பை ஏற்படுத்தியுள்ளது.
