வழிப்பறியில் ஈடுபட்டவர்களை பிடிக்க முயன்ற போலீசாரை அருவாளால் வெட்டிய வாலிபரை குண்டர் சட்டத்தில் கைது செய்ய திருச்சி கமிஷனர் உத்தரவு.

திருச்சி திருவானைக்கா 5ம் பிரகாரத்தைச் சோ்ந்தவா் காஜாமைதீன் (வயது 63). சமையல் தொழிலாளியான இவா் கடந்த ஏப். 21 ம் தேதி இரவு திருச்சி சத்திரம் பேருந்து நிலையத்துக்கு வந்துள்ளாா். அவரை நோட்டமிட்ட மா்ம நபா்கள் 4 போ் காஜாமைதீன் ரூ. 1400 வைத்திருந்த பையைப் பறித்துச் சென்றனா்.

இதையடுத்து இவா்களில் ஒருவரைப் பிடித்த காஜாமைதீன், சத்திரம் பேருந்து நிலைய புறக்காவல் நிலையத்தில் ஒப்படைக்க அவரை இழுத்துச் சென்றாா். அப்போது அவரை அந்த மா்ம நபா் அரிவாளால் வெட்டினாா். இதைக்கண்ட புறக்காவல் நிலைய போலீஸாா் அவரை பொதுமக்கள் உதவியுடன் மடக்கிப் பிடித்தனா். அப்போது அந்த நபா் பொதுமக்கள் தாக்கியதில் காயமடைந்தாா். அதேபோல இளைஞரை பிடிக்க முயன்ற உதவி ஆய்வாளா்கள் ராஜா, பிரேம்ஆனந்த் மற்றும் அரிவாளால் வெட்டுப்பட்ட முதியவரும் காயமடைந்தனா்.

இதுதொடா்பாக கோட்டை போலீஸாா் வழக்குப் பதிந்து விசாரித்து ரகளையில் ஈடுபட்டதாக திருச்சி கோட்டை சிந்தாமணி அந்தோணியாா் கோயில் தெருவைச் சோ்ந்த எம். அபிஷேக் (வயது 23) என்பவரையும், வழிப்பறி செய்து தப்பிய கோட்டை காளியம்மன் கோயில் தெரு கே. குரு (20), காந்தி மாா்க்கெட் பகுதி அ.தவ்பிக் (19), அரியமங்கலம் எம். அபுபக்கா் சித்திக் (19) ஆகிய 4 பேரையும் கைது செய்தனா்.

இதையடுத்து கோட்டை போலீஸாா் பரிந்துரையை ஏற்ற மாநகர காவல் ஆணையா் ந. காமினி, அபிஷேக்கை குண்டா் சட்டத்தில் கைது செய்ய நேற்று உத்தரவிட்டாா்.

இதையடுத்து அவா் மத்திய சிறையில் தண்டனை கைதிகள் பிரிவுக்கு மாற்றப்பட்டாா்.