திருச்சியைச் சோ்ந்த என். மரியம்பிச்சை அமைச்சராக பதவியேற்க சென்றபோது விபத்தில் உயிரிழந்த வழக்கில் காா் ஓட்டுநா் உள்பட 2 பேருக்கு 16 மாதங்கள் சிறைதண்டனை விதித்து பெரம்பலூா் மாவட்ட நீதிமன்றம் உத்தரவிட்டது.
திருச்சி சங்கிலியாண்டபுரத்தைச் சோ்ந்த நல்லமுகமது மகன் என். மரியம்பிச்சை. இவா், 2011 பேரவைத் தோ்தலில் திருச்சி மேற்குத் தொகுதியில் கே. என். நேருவை எதிா்த்து போட்டியிட்டு வெற்றி பெற்றாா். இதையடுத்து சுற்றுச்சூழல் அமைச்சராக அறிவிக்கப்பட்ட அவா், 23.5.2011-இல் திருச்சி முத்தரையர் சிலைக்கு மாலை அணிவித்து விட்டு பதவியேற்பதற்காக காரில் சென்னைக்கு சென்று கொண்டிருந்தாா். காரை சென்னை, முகப்பேறு மேற்கு வெள்ளாளத் தெருவைச் சோ்ந்த வெங்கடேசன் மகன் ஆனந்தன் (வயது 27) ஓட்டினாா்.
திருச்சி- சென்னை தேசிய நெடுஞ்சாலையில் பெரம்பலூா் மாவட்டம், திருவிளக்குறிச்சி பிரிவுச் சாலை அருகே சென்றுக்கொண்டிருந்தபோது, முன்னாள் சென்ற கன்டெய்னா் லாரியை காா் ஓட்டுநா் முந்திச்செல்ல முயன்றாா்.அப்போது, லாரியின் பின்புறம் காா் மோதி விபத்துக்குள்ளானது. இதில் பலத்த காயமடைந்த மரியம்பிச்சை திருச்சி அரசு மருத்துவமனைக்கு கொண்டுச் செல்லும் வழியில் உயிரிழந்தாா்.
மேலும், காரில் பயணித்த வெங்கடேஷ், மாதேஸ்வரன், காா்த்திகேயன் மற்றும் காா் ஓட்டுநா் ஆனந்தன் ஆகியோா் காயமடைந்தனா்.
இதுகுறித்த புகாரின்பேரில், பாடாலூா் போலீஸாா் விசாரணை மேற்கொண்டு அமைச்சரின் காா் ஓட்டுநா் ஆனந்தன், கன்டெய்னா் லாரி ஓட்டுநா் ஆந்திராவைச் சோ்ந்த நியமத்துல்லா ஆகியோா் மீது வழக்குப் பதிந்தனா்.
இதையடுத்து 2011 ஆம் ஆண்டு மே 24 ஆம் தேதி அரசு உத்தரவின்படி, இவ்வழக்கு திருச்சி சிபிசிஐடிக்கு மாற்றப்பட்டது. இந்த வழக்கு பெரம்பலூா் மாவட்ட தலைமை குற்றவியல் நீதிமன்றத்தில் நடைபெற்றது.
இந்நிலையில் இந்த வழக்கு நேற்று திங்கள்கிழமை விசாரணைக்கு வந்தது. அப்போது, காா் ஓட்டுநா் ஆனந்தன், கன்டெய்னா் ஓட்டுநா் நியமித்துல்லா இருவரும் ஆஜராகினா். வழக்கை விசாரித்த நீதிபதி சங்கா், விபத்து ஏற்படுத்திய ஆனந்தனுக்கு 16 மாதங்கள் சிறை தண்டனையும், ரூ. 3 ஆயிரத்து 500 அபராதமும், நியமித்துல்லாவுக்கு 16 மாதங்கள் சிறை தண்டனையும், ரூ. 4 ஆயிரம் அபராதமும் விதித்து தீா்ப்பளித்தாா்.
இதையடுத்து இருவரையும் போலீஸாா் திருச்சி மத்திய சிறைக்கு கொண்டுச்சென்றனா்.
