கொள்ளிடத்தில் நீர் பற்றாக்குறை. ஒருவேளை மட்டுமே குடிநீர் விநியோகம். திருச்சி மாநகராட்சி ஆணையர் தகவல்

'- Advertisement -

திருச்சி மாநகராட்சி ஆனையர் வெளியிட்டுள்ள செய்திக்குறிப்பில் தெரிவித்திருப்பதாது; கொள்ளிடம் ஆற்றில் நீரோட்டம் மற்றும் நீர்மட்டம் கணிசமாகக் குறைந்துள்ளது. இதன் நேரடித் தாக்கமாக, ஆற்றுப் பகுதியில் அமைந்துள்ள ஆலவந்தான் படித்துறை உந்து நிலையம் போதிய அளவு தண்ணீரை உறிஞ்சிக் குழாய்களில் செலுத்த முடியாத நிலை ஏற்பட்டுள்ளது.

இப்பகுதியில் உள்ள கிணறுகள் மற்றும் நீர் சேகரிப்பு நிலையங்களில் நீர் இருப்பு குறைந்ததே இந்த நிலைக்குக் காரணமாகும். இதன் விளைவாக, தற்போதைய சூழலில் பழைய கால அட்டவணையின்படி முழு அளவில் குடிநீரை விநியோகிப்பது மாநகராட்சிக்குச் சவாலாக மாறியுள்ளது. எனவே, நீர் ஆதாரங்களை முறைப்படுத்துவதற்காக இந்தத் தற்காலிகக் கட்டுப்பாடு விதிக்கப்பட்டுள்ளது.மாநகராட்சி நிர்வாகத்தின் இந்த அறிவிப்பு ஸ்ரீரங்கம் பகுதியின் வார்டுகள் 1 முதல் 7 வரை வசிக்கும் பொதுமக்களை நேரடியாகப் பாதிக்கும்.

இதற்கு முன்பு வரை, இந்த ஏழு வார்டுகளிலும் உள்ள குடியிருப்புகளுக்குத் தினசரி காலை மாலை என இரண்டு வேளை குடிநீர் விநியோகிக்கப்பட்டு வந்தது. அதன்படி, காலையில் 5:00 மணி முதல் 8:30 மணி வரையிலும், மீண்டும் மாலையில் 5:00 மணி முதல் 6:00 மணி வரையிலும் குடிநீர் விநியோகம் செய்யப்பட்டது.

கொள்ளிடத்தில் நீர் பற்றாக்குறை நிலவி வருவதால், இந்த வார்டுகளில் வசிக்கும் மக்களுக்கு இனி தினசரி ஒரு வேளை மட்டுமே குடிநீர் வழங்கப்படும். அதன்படி, காலை 5:00 மணிக்குத் தொடங்கும் குடிநீர் விநியோகம் காலை 8:00 மணி வரை மட்டுமே (3 மணி நேரம்) விநியோகிக்கப்படும். மாலை நேரக் குடிநீர் விநியோகம் முற்றிலும் நிறுத்தப்பட்டுள்ளது.கொள்ளிடம் ஆற்றில் நீர்வரத்து அதிகரித்து, நீர்மட்டம் மீண்டும் இயல்பு நிலைக்குத் திரும்பும் வரை இந்த ஒரு வேளை குடிநீர் விநியோக முறை அமலில் இருக்கும் என்று அதிகாரிகள் தெளிவுபடுத்தியுள்ளனர்.

எனவே, இந்த இக்கட்டான காலகட்டத்தில் நிலவும் நீர் பற்றாக்குறையைக் கருத்தில் கொண்டு, பொதுமக்கள் அனைவரும் மாநகராட்சி நிர்வாகத்தின் இந்தத் தற்காலிக நடவடிக்கைக்கு முழு ஒத்துழைப்பு நல்க வேண்டும் என்று கேட்டுக்கொள்ளப்பட்டுள்ளது. மேலும், குழாய்கள் மூலம் வழங்கப்படும் குடிநீரை வீணடிக்காமல், மிகவும் சிக்கனமாகவும், அத்தியாவசியத் தேவைகளுக்கு மட்டுமே பிரத்தியேகமாகப் பயன்படுத்த வேண்டும் என்றும் மாநகராட்சி ஆணையர் வெளியீட்டு உள்ள செய்திக்குறிப்பில் தெரிவித்துள்ளார்